San Antonio vann fyrsta leikinn

San Antonio vann fyrsta leikinn gegn Utah í úrslitum Vesturdeildar NBA-deildarinnar í nótt, 108-100. Tim Duncan gegndi lykilhlutverki í sigri San Antonio, en fjölmiðlar vestra segja hann sjaldan eða aldrei hafa spilað betur á sínum ferli.

Duncan skoraði 27 stig í nótt, en hirti auk þess 10 fráköst, gaf 5 stoðsendingar og blokkaði tvö skot. Manu Ginobili skilaði einnig sínu með 23 stigum og 10 stoðsendingum og þá skoraði Tony Parker 21 stig í leiknum. Hjá Utah átti Deron Williams frábæran leik og skoraði 34 stig.

Sigur San Antonio var aldrei í hættu en liðið var með 19 stiga forystu í hálfleik og náði auk þess 18 stiga forskoti í 4. og síðasta leikhlutanum. Utah spilaði þó mun betur í síðari hálfleik en í þeim fyrri og sýndi þá að liðið á í fullu tré við San Antonio á góðum degi.

“Í næsta leik munu þeir verða betur undirbúnir. Við megum eiga von á sömu frammistöðu í næsta leik hjá þeim eins og þeir sýndu í síðari hálfleik. Við verðum að vera tilbúnir að gera enn betur en það,” sagði Tony Parker í leikslok.