Óvæntustu úrslit í sögu úrslitakeppni NBA

Öskubuskulið Golden State Warriors er komið í aðra umferð úrslitakepninnar í NBA deildinni eftir stórsigur á Dallas Maverics í stórkostlegum sjötta leik liðanna í nótt 111-86. Þetta eru almennt talin óvæntustu úrslit í sögu úrslitakeppninnar, en Golden State vann einvígið 4-2.

Golden State sýndi strax að liðið ætlaði ekki að þurfa að fara aftur til Dallas í einvíginu og tók strax 12-0 rispu og fékk áhorfendur á sitt bandi. Þegar nokkuð var liðið á fyrsta fjórðung byrjaði dramatíkin, þar sem Baron Davis haltraði af velli tognaður á læri og útlitið ekki bjart fyrir heimamenn. Davis hefur verið besti leikmaður fyrstu umferðar allrar úrslitakeppninnar og var hetjuleg frammistaða hans á tognuðu læri og bólgnu hné eitthvað sem á eftir að fara í sögubækurnar.

Davis sneri fjótlega aftur, en bókstaflega haltraði um völlinn. Það stöðvaði hann ekki i stigaskoruninni, en hann átti aftur á móti erfitt með varnarleikinn. Golden State hafði þrátt fyrir meiðsli leiðtoga síns 50-48 forystu í hálfleik. Í þriðja leikhlutanum var svo röðin komin að villingnum Stephen Jackson, en hann setti niður fjórar þriggja stiga körfur á skömmum tíma og hafði þá hitt úr öllum 7 þristum sínum í leiknum. Sýning Jackson kveikti heldur betur í áhorfendaskaranum í Oakland, þar sem Hollywood stjörnurnar létu sig ekki vanta, og vann Golden State þriðja leikhlutann 36-15.

Eftir þetta náði Dallas sér aldrei á strik í leiknum og segja má að meiriparturinn af fjórða leikhlutanum hafi aðeins verið formsatriði fyrir heimamenn. Dirk Nowitzki hjá Dallas, sem að öllum líkindum verður valinn verðmætasti leikmaðurinn í NBA í deildarkeppninni, náði sér aldrei á strik í leiknum. Jerry Stackhouse hélt liðinu á floti í fyrri hálfleik og Josh Howard átti ágætar rispur, en Golden State sýndi og sannaði að liðið þráði sigurinn einfaldlega meira en hærra skrifaðir andstæðingarnir.

Jackson sjóðandi heitur - Nowitzki ískaldur

Stephen Jackson átti frábæran leik fyrir Golden State og skoraði 33 stig og hitti úr 7 af 8 þriggja stiga skotum. Baron Davis skoraði 20 stig, hirti 10 fráköst og gaf 6 stoðsendingar á annari löppinni, Matt Barnes skoraði 16 stig og hirti 11 fráköst og Jason Richardson skoraði 15 stig. Andris Biedrins skoraði 12 stig og hirti 12 fráköst.

Josh Howard og Jerry Stackhouse skoruðu 20 stig hvor fyrir Dallas, Jason Terry og Devin Harris skoruðu 13 stig hvor og Dirk Nowitzki skoraði aðeins 8 stig, hirti 10 fráköst og hitti úr 2 skotum sínum af 13.

Smelltu hér til að sjá alla tölfræði úr leiknum.

Dallas náði sjötta besta árangri í sögu deildarkeppninnar í NBA í vetur og vann 67 af 82 leikjum sínum. Flestir hölluðust að því nú undir vorið að lið Dallas væri sigurstranglegasta liðið í úrslitakeppninni, eftir að það spilaði einstaklega vel í deildarkeppninni og sýndi hungur sitt eftir svekkjandi tap í lokaúrslitunum gegn Miami síðasta sumar. Þetta var áður en sirkuslið Golden State kom til sögunnar.

Ótrúlegt einvígi

Golden State-liðið virtist ekki líklegt til að ná góðum árangri framan af vetri, því meiðsli settu stórt strik í reikninginn og fljótlega eftir áramótin lýsti Don Nelson þjálfari því yfir í viðtali við fjölmiðla að lið hans ætti ekki möguleika á að komast í úrslitakeppnina. Það var ekki heldur til þess að auka á bjartsýni í herbúðum liðsins þegar félagið gerði stór leikmannaskipti í janúar þar sem það fékk til sín leikmenn á borð við Al Harrington og Steven Jackson.

Þessi ummæli hans virkuðu sem vítamínssprauta á liðið, sem tryggði sér sæti í úrslitakeppninni á síðasta degi deildarkeppninnar. Þar var tónninn settur fyrir dramatíkina sem á eftir kom, en úrslit einvígisins eru ekki aðeins einhver þau óvæntustu í sögu deildarinnar - heldur var hver einasti leikur í seríunni stórkostleg skemmtun.

Þetta var aðeins í þriðja skipti í sögu NBA deildarinnar sem liðið í áttunda sæti inn í keppnina slær liðið í fyrsta sæti úr keppni. Denver sló þannig út Seattle árið 1994 og New York sló út Miami árið 1999, en hafa ber í huga að það var í seríum þar sem þrjá sigra þurfti til að komast áfram.

Leikurinn í nótt var sýndur í beinni útsendingu á NBA TV sjónvarpsstöðinni á Fjölvarpinu og verður hann endursýndur að minnsta kosti einu sinni í dag. Þá er rétt að minna á að sjónvarpsstöðin Sýn verður með leikinn á dagskrá undir miðnættið í kvöld og þar gefst áhorfendum tækifæri til að sjá NBA söguna endurskrifaða.