Maðurinn flaugst á við Shaquille O´Neal og lifði það af

Chicago Bulls og Miami Heat mætast öðru sinni í fyrstu umferð úrslitakeppni NBA í kvöld. Scott Skiles þjálfari Chicago spilaði með Shaquille O´Neal hjá Miami þegar hann var nýliði með liði Orlando Magic árið 1992 og vann sér það þá til frægðar að slást við tröllið og lifa það af.

Skiles er ekki nema rúmir 180 cm á hæð, en var þekktur harðjaxl á dögum sínum sem leikmaður. Hann var fyrirliði Orlando-liðsins þegar O´Neal kom inn í deildina sem nýliði. Dálkahöfundur ESPN-sjónvarpsstöðvarinnar rifjaði það upp í dag þegar þeir Skiles og O´Neal lentu í áflogum fyrir nær þrettán árum síðan og naut þar aðstoðar Larry Krystkowiak sem nú er þjálfari Milwaukee Bucks, en var samherji þeirra tveggja hjá Orlando árið 1994.

"Við vorum á keppnisferðalagi um vesturströndina og spiluðum við Clippers og Lakers í Los Angeles. Þjálfararnir voru mjög ósáttir við baráttuna í mannskapnum í þessari ferð og við töpuðum fyrri leiknum okkar. Daginn eftir fyrri leikinn var smalað í þrjú fjögurra manna lið á æfingu og þar var ég hæsti maðurinn í mínu liði og þurfti því að dekka Shaq. Skiles var alltaf vanur að láta menn heyra það og ég er viss um að hann sat fund með þjálfurunum, því menn kölluðu ekki villur á æfingunni sem varð mjög hörð fyrir vikið.

Við Shaq fórum að takst ansi hart á og fórum að lokum að rífast heiftarlega og þá kallaði Skiles á okkur - "Af hverju hættið þið ekki að haga ykkur eins og dúkkulísur og leysið þetta eins og menn." Við fórum að slást og duttum í gólfið, en þá er eins og Skiles hafi áttað sig á alvöru málsins og stökk hann á O´Neal og reyndi að taka hann hálstaki. Við Skiles vorum góðir vinir og hann hefur ef til vill áttað sig á því að hann átti sumpart upptökin af þessu," sagði Krystowiak.

Skiles segist vel muna eftir viðskiptum sínum við tröllið. "Hann reyndi að kýla mig en ég beygði mig og hann endaði á því að taka mig föstu hálstaki. Höggið lenti þó að hluta á mér," sagði Skiles.

Krystkowiak segir að þessi rimma manna á æfingunni hafi þjónað sínum tilgangi og stappað stálinu í mannskapinn. Orlando vann 50 leiki þennan vetur, en tapaði í fyrstu umferð úrslitakeppninnar fyrir Indiana. Það var í síðasta skipti á ferlinum til þessa sem Shaquille O´Neal datt út í fyrstu umferð úrslitakeppninnar.

"Hann fór alltaf í taugarnar á mér," sagði Shaquille O´Neal í viðtali eftir fyrsta leik Chicago og Miami á dögunum - "En hann er besti leikstjórnandi sem ég hef spilað með á ferlinum. Ef var smuga á að finna mig undir körfunni - fann hann mig alltaf," sagði O´Neal og sagði málið gleymt og grafið. Skiles tók í sama streng, en þeir félagar taka nú enn eina rimmuna á vellinum þó þeir séu í ólíku hlutverki í dag og þá.

Fjórði leikur Miami og Chicago verður Sýndur beint á Sýn Extra klukkan 17 á sunnudaginn.