50 stig Bryants dugðu ekki gegn Clippers

Kobe Bryant skoraði 50 stig fyrir LA Lakers gegn nágrannaliðinu LA Clippers í NBA-deildinni í nótt en það dugði ekki til sigurs því Clippers vann 118-110. Corey Magette átti stórleik hjá Clippers og skoraði 39 stig sem er persónlegt met hjá honum í deildinni.

Elton Brand skoraði 32 stig fyrir Clippers sem batt enda á þriggja leikja taphrinu. Liðið er nú jafnt Golden State að stigum í áttunda sæti Vesturdeildar sem er það síðasta sem gefur sæti í úrslitakeppni deildarinnar, en fjórir leikir eru eftir af deildarkeppninni.

Í hinum leiknum sem var í NBA-deildinni í gærkvöld sigraði Cleveland Cavaliers New Jersey Nets nokkuð örugglega, 94-76. LeBron James skoraði 35 stig fyrir Cleveland. Með þessu tryggði Cleveland sér heimaleikjarétt í fyrstu umferð úrslitakeppni Austurdeildarinnar.