Frækinn sigur AC Milan í Munchen

AC Milan tryggði sér í kvöld sæti í undanúrslitum Meistaradeildar Evrópu með fræknum 2-0 útisigri á Bayern Munchen. Ítalska liðið fer því áfram samtals 4-2 og mætir Manchester United í næstu umferð. Liverpool vann 1-0 sigur á PSV Eindhoven og 4-0 samanlagt og mætir Chelsea í undanúrslitum.

Leikmenn Bayern mættu grimmir til leiks í kvöld en vörn ítalska liðsins náði að halda aftur af stífum sóknum þeirra í byrjun. Reynsluboltarnir í Milan nýttu sér mistök þýska liðsins og gerðu út um leikinn á fjögurra mínútna kafla í fyrri hálfleik þegar þeir Clarence Seedorf og Filippo Inzaghi skoruðu sitt hvort markið. Inzaghi var greinilega rangstæður þegar hann skoraði mark sitt, en hafði heppnina með sér eins og svo oft gegn þýska liðinu. Hann skoraði í kvöld sjötta mark sitt í fimm leikjum gegn Bayern á ferlinum.

Þrátt fyrir ágæta tilburði heimamanna náðu þeir ekki að brjóta sterka vörn ítalska liðsins á bak aftur og Milan því nokkuð óvænt komið í undanúrslitin gegn Manchester United.

Liverpool mætir Chelsea í hinum undanúrslitaleiknum eftir 1-0 sigur á PSV Eindhoven á heimavelli. Enska liðið fer því áfram samanlagt 4-0 og var leikurinn í kvöld aðeins formsatriði eftir góða frammistöðu liðsins í Hollandi í fyrri leiknum. Dirk Marcellis var rekinn af velli í liði PSV í kvöld og skömmu síðar, á 67 mínútu, skoraði Peter Crouch sigurmark liðsins. Það eina sem Rafa Benitez þurfti að hafa áhyggjur af í kvöld var í raun meiðsli framherjans Craig Bellamy, en hann var borinn af velli meiddur á hné.

Fyrsti leikurinn í undanúrslitunum verður viðureign Manchester United og AC Milan á Old Trafford þann 24. apríl og daginn eftir verður fyrri leikur Chelsea og Liverpool á Stamford Bridge í Lundúnum. Síðari leikur Milan og Man Utd fer fram í Mílanó 2. maí og daginn eftir spila Liverpool og Chelsea á Anfield í Liverpool. Leikirnir, sem og úrslitaleikurinn á Ólympíuleikvangnum í Aþenu þann 23. maí - verða allir sýndir beint á sjónvarpsstöðinni Sýn.