Reyndi að refsa Lampard

Ósáttur aðdáandi hljóp út á völlinn eftir að leik Chelsea og Tottenham lauk í kvöld og reyndi að gefa Frank Lampard, leikmanni Chelsea, einn á lúðurinn. Lampard var að fagna með liðsfélögunum sínum þegar maðurinn kom hlaupandi með hnefann á lofti og rétt náði að bregða sér undan hægrihandarsveiflu hins reiða áhanganda Tottenham. Öryggisverðir brugðust snögglega við og yfirbuguðu manninn á örskotsstundu.

Jose Mourinho, framkvæmdastjóri Chelsea, sagði að sennilega hefðu öryggisverðirnir slakað á í stutta stund eftir að leiknum lauk og þar með gefið misyndismanninum tækifæri til þess að hlaupa inn á völlinn. Sky fréttastöðin skýrði frá því að fleiri en reiði maðurinn hefðu verið handteknir eftir að leiknum lauk.