Hnignandi tannheilsa barna afrakstur stefnu stjórnvalda

Formaður Tannlæknafélags Íslands segir hnignandi tannheilsu íslenskra barna vera afrakstur stefnu stjórnvalda síðastliðin 10 ár. Miklu hærri fjárframlög þurfi, vilji þjóðin halda góðri tannheilsu.

Í kvöldfréttum Stöðvar tvö í gær var greint frá nýrri rannsókn Lýðheilsustöðvar og Heilsugæslustöðva sem sýndi að tannheilsu barna hefur hrakað á síðustu 10 árum. Tannskemmdir eru nú tvöfalt fleiri í íslenskum börnum en sænskum. Þá eru börn lágtekjufólks með tvöfalt fleiri skemmdir í tönnum en börn hátekjufólks. Fréttastofa ræddi við tannlækni í gær sem hafði þurft að draga allar átján tennurnar úr tæplega sex ára gömlu barni vegna skemmda.

Sigurjón Benediktsson formaður Tannlæknafélags Íslands segir þessar niðurstöður ekki koma á óvart, tannlæknar hafi varað við þessu í mörg ár. Styrkirnir til niðurgreiðslu tannlækninga hafi farið hríðlækkandi síðustu ár og það bitni mest á lágtekjufólki. Sigurjón segir að tannheilsa íslenskra barna hafi verið miklu betri fyrir 10 árum í samanburði við hin Norðurlöndin. Hið opinbera sjái um að veita fé í þessi mál og það sé undir þeim komið að auka fjárframlögin til þessa málaflokks, vilji fólk halda góðri tannheilsu.