Lifði af hátt fall

Læknar, í Björgvin í Noregi, segja það ganga kraftaverki næst að tveggja ára drengur hafi lifað af fall út um glugga á heimili sínu í gær. Drengurinn skall á gangstétt við húsið og sá ekki á honum. Íbúð fjölskyldunnar er á fjórðu hæð.

Ibrahim Ahmed, faðir drengsins, segir konu sína hafa heyrt eldri son sinn kalla á sig. Hún hafi hlaupið inn í stofun og þar hafi hann setið grátandi. Ahmed segir fallið hátt, líkast til 12 til 15 metrar og beint á steinsteypta gangstéttina.

Strákurinn var þegar fluttur á sjúkrahús og segja læknar það kraftaverk að ekki hafi farið illa. Ekki sáust skrámur á drengnum og ekki kenndi hann sér meins. Ahemd segir þau hafa þakkað Guði.