14 ára fangelsi fyrir særingartilraun

Rúmenskur prestur var í gær dæmdur í 14 ára fangelsi fyrir að hafa myrt 23 ára nunnu þegar hann var að reyna að særa djöfulinn sjálfan úr henni.

Systir Maricica Irina Cornici var í meðferð við geðklofa en hún fullyrti að djöfullinn talaði við sig. Danie Petru Corogeanu, munkur sem sinnti prestsembætti í afviknu klaustri Heilagrar þrenningar í norðausturhluta Rúmeníu, hlekkjaði Cornici við kross þangað til hún lést. Fjórar nunnur hjálpuðu honum við verkið.

Dómstóll í borginni Vaslui dæmdi Corogenau í 14 ára fangelsi. Ein af nunnunum fékk átta ár en hinar þrjár fimm hver. Tugir stuðningsmanna prestsins fylltu réttarsalinn og báðu fyrir honum á meðan réttarhaldinu stóð. Margir brustu í grát þegar dómur var upp kveðinn.

Lögfræðingar hinna ákærðu ætla sér að áfrýja niðurstöðu dómstólsins þar sem þeir segja fangelsisdómana allt of langa.