Barcelona með fullskipað lið gegn Liverpool

Evrópumeistarar Barcelona verða í fyrsta skipti í nokkra mánuði með fullskipað lið þegar liðið tekur á móti Liverpool á Nou Camp á miðvikudagskvöld. Franski varnarmaðurinn Lilian Thuram er nú byrjaður að æfa á ný eftir mánaðar fjarveru og því hefur Frank Rijkaard loksins endurheimt alla sína leikmenn úr meiðslum.

Enn á þó eftir að koma í ljós hvort Kamerúninn Samuel Eto´o verður í liði Barcelona í fyrri leiknum gegn Liverpool á miðvikudagskvöldið, en hann hefur átt í deilum við forráðamenn félagsins síðan hann kom til baka eftir erfið hnémeiðsli. Eto´o er ekki kominn í fullt leikform og væntanlega verður hann sá maður sem hefur mest áhrif á það hvort Eiður Smári Guðjohnsen fær að spila gegn Liverpool eða ekki. Leikur Barcelona og Liverpool verður sýndur beint á Sýn, en veislan hefst annað kvöld með viðureign Lille og Manchester United.