Heimamenn eignast Hraðfrystistöð Þórshafnar

Fræ ehf., eignarhaldsfélag í eigu Langanesbyggðar, hefur keypt 30% eignarhlut FSP hf. í Hraðfrystistöð Þórshafnar hf. og fer nú með 60% eignarhlut í félaginu en 30% eru í eigu Þórskaupa og 10% í eigu Þórshafnar fjárfestingar.

22. desember á síðasta ári gekk Þórshöfn fjárfesting frá sölu á 90% eignarhlut sínum í Hraðfrystistöð Þórshafnar til Ísfélags Vestmannaeyja með þeim fyrirvara að eigendur Þórshafnar fjárfestingar myndu ekki neyta forkaupsréttar að hinum seldu hlutum. Eigendur Þórshafnar fjárfestingar neyttu allir forkaupsréttar og varð því ekkert úr sölunni til Ísfélags Vestmannaeyja.

Björn Ingimarsson stjórnarformaður Fræ ehf. hafði þetta að segja um kaupin: „Hraðfrystistöð Þórshafnar er lykilfyrirtæki hér á þessu svæði og að mörgu leyti lífæð sveitarfélagsins. Það er því verulega mikilvægt fyrir þróun allrar byggðar á Langanesi að vel takist til um framtíðarskipulag og eignarhald á Hraðfrystistöð Þórshafnar. Við þökkum FSP kærlega fyrir ánægjulegt samstarf."

Kjartan Broddi Bragason framkvæmdastjóri FSP sagði aðspurður: „Við fórum inn í þetta verkefni á sínum tíma sem skammtímaverkefni og á forsendum heimamanna þar sem meðal annars var stefnt að því að leggja drög að framtíðareignarhaldi á félaginu."