Stórleikur Tracy McGrady dugði skammt

Texasliðin Dallas og Houston áttust við í NBA deildinni í nótt og var það sjóðheitt lið Dallas sem hafði betur 109-96 eftir að hafa staðið af sér stórskotahríð Tracy McGrady hjá Houston, en hann skoraði 21 af 45 stigum sínum í fyrsta leikhlutanum. Dirk Nowitzki skoraði 30 stig og hirti 10 fráköst fyrir Dallas.

New Orleans lagði Orlando óvænt 84-78 þar sem Dwight Howard skoraði 17 stig og hirti 15 fráköst fyrir Orlando en Janero Pargo skoraði 25 stig fyrir meiðslum hrjáð lið New Orleans.

Loks vann Seattle nokkuð óvæntan sigur á Cleveland 101-96 á heimavelli sínum. Ray Allen skoraði 22 stig og gaf 11 stoðsendingar hjá Seattle en hitti raunar aðeins úr 6 af 21 skoti sínu. LeBron James skoraði 30 stig, hirti 7 fráköst og gaf 8 stoðsendingar hjá Cleveland og Zydrunas Ilgauskas skoraði 24 stig og hirti 11 fráköst.