Gengu af fundi

Fulltrúar flugumferðarstjóra gengu af fundi með fulltrúum Flugstoða á níunda tímanum í gærkvöldi án niðurstöðu. Efnislegt samkomulag hafði náðst um lífeyrismál, sem eru helsti ásteytingarsteinninn, en formsatriði kom í veg fyrir að skrifað væri undir samkomulagið.

Flugstoðir kröfðust þess að undirskrift stjórnarmanna í Félagi íslenskra flugumferðarstjóra gilti skilyrðislaust án þess að samkomulagið yrði fyrst borið undir fund flugumferðarstjóra, með þeim rökum að ekki sé um kjaradeilu að ræða, heldur aðilaskipti. Þetta gátu fulltrúar flugumferðarstjóra ekki fellt sig við.