Brynjar þríbrotnaði á vinstri úlnlið

Brynjar Valsteinsson, leikmaður HK, verður ekki meira með í úrslitum deildarbikarkeppninnar og gæti misst af upphafi næsta tímabils. Hann þríbrotnaði á úlnlið í vinstri hendi í leik gegn Stjörnunni í fyrrakvöld er hann lenti illa eftir að hafa keyrt upp völlinn í hraðaupphlaupi.

„Ég man vel eftir þessu og tel að um brot hafi verið að ræða," sagði Brynjar við Fréttablaðið í gær. „Ég veit nú ekki hvort þetta hafi verið viljandi en það sem er verst í þessu er að þetta er stórhættulegt brot."

Dómarar leiksins vilja meina að leikmaður Stjörnunnar og fyrrum félagi Brynjars hjá HK, Elías Már Halldórsson, hafi ekki verið búinn að taka sér stöðu þegar Brynjar rakst utan í hann með fyrrgreindum afleiðingum.

Brynjar var kominn í loftið þegar honum lenti saman með Elíasi, missti stjórn á sér og lenti með vinstri höndina undir líkamananum. „Höndin hreinlega afmyndaðist," sagði hann.

Það er þó bót í máli að hann er rétthentur. Þó er ljóst að hann verður frá í einhverja mánuði. „Ég veit ekki hversu alvarleg meiðslin eru. Ég ligg nú uppi í rúmi sárkvalinn og þarf jafnvel að bíða fram yfir helgi þar til ég get hitt sérfræðing. Þá kemur í ljós hvort ég þurfi að fara í aðgerð.

„Ég get nú ekki sagt almennilega hvaða bein eru brotin en þetta er allt í úlnliðnum. Eitt brotið er langt og nær alla leið inn í liðinn. Það er það versta af þeim þremur," sagði Brynjar.

Aðstoðarþjálfari HK, Gunnar Magnússon, sagði að atvikið hefði ekki litið vel út. „Ég sá þetta ekki nógu vel til að sjá hvort hann fór með mjöðmina í Brynjar eða hvort hann var búinn að taka sér stöðu. En þetta var ekki fólskulegt brot, ég trúi því ekki að þetta hafi verið viljandi. Það er frekar að þetta hafi verið klaufalegt en það er alltaf hættulegt að keyra á mann sem er á fullu í hraðaupphlaupi," sagði Gunnar.

Brynjar bætti því við að hann stefndi á að verða klár í haust. „Ég ætla að reyna að æfa vel í sumar enda spennandi tímabil framundan sem og Evrópukeppni."