Aðeins brot af jörðinni fór ekki undir vatn

Flóðið í Hvíta er í rénun og búið er að opna flesta vegi í Árnessýslu. Ekki er enn fært á bíl að Vatnsnesi í Grímsnesi og Gjábakkavegur frá Laugarvatni að Þingvöllum er enn lokaður vegna mikils vatns á Laugardalsvöllum. Búið að gera við flest alla vegi sem fóru undir vatn í gær og tjónið óverulegt. Svona var útlits við Björnskot á Skeiðum í gær en aðeins fimmtungur úr hektara af jörðinni sem 140 hektar fór ekki undir vatn að sögn Ólafs Leifssonar bónda í Björnskot.

Fimm til sex hundruð kílóa heyrúllur flutu eins og korktappar í flóðinu og telur Ólafur að um eitt hundrað rúllur hafi eyðilagst. Ólafur telur að aðeins þriðjungur af heyrúllum hans séu þurrar en þær fá mjólkurkýrnar. Þurru rúllurnar munu þó aðeins duga fram í mars og telur Ólafur að hann þurfi að kaupa um 80 til 100 heyrúllur ef þær liggja þá einhversstaðar á lausu.

Í einu útihúsinu hefur Ólafur aðstöðu fyrir smíðaverkstæði og þar er allt á rúi og stúi eftir flóðið. Aðgerðir til að bjarga fystikistu dugðu ekki til en henni var lyft upp á borð. Ólafur segir að sér hafi ekki órað fyrir því að vatnsmagnið yrði svona mikið. Hann veit ekki hversu vel hann er tryggður fyrir tjóni sem þessu en hann þakkar öllum sem komu til hjálpar í gær.