Ómeidd eftir að áætlunarbíll valt

Átta farþegar og ökumaður sluppu ómeiddir þegar áætlunarbíll valt út af Snæfellsnesvegi skammt frá Hítará um kl. 21:30 í gærkvöldi. Að sögn lögreglu var fljúgandi hálka á veginum þar sem óhappið varð.

Hinsvegar slasaðist kona á fimmtugsaldri, þegar bíll hennar valt út af Eyrarbakkavegi um sjöleitið í gærkvöldi og hafnaði ofan í skurði. Til allrar hamingju hafnaði bíllinn á hjólunum ofan í skurðinum, því talsvert vatn var í honum. Björgunarmenn þurftu að beita klippum til þess að ná konunni út úr bílnum, og var hún flutt á Slysadeild Landsspítalans í Reykjavík.