Neyðarástandi lýst yfir á Fídjieyjum

Útvarpið á Fídjieyjum greindi frá því í nótt að neyðarástandi verði lýst yfir í landinu í dag, en herinn framdi valdarán í landinu í fyrrinótt. Það var það fjórða sem framið er á eyjunum síðastliðin 20 ár.

Samkvæmt tilkynningunni verður höfuðborgin Suva girt af, útgöngubann verður sett á auk þess sem allt varalið hersins verður kallað út. Valdaránið kemur í kjölfar deilna á milli yfirmanns hersins og forsætisráðherra landsins en þeir hafa eldað grátt silfur saman undanfarið ár. Aðalástæða valdaránsins var sú að hershöfðinginn taldi forsætisráðherran sýna fyrrum valdaræningjum of mikla linkind.