Djúpt á ástinni

Hvar myndir þú vilja gifta þig? Í kirkju, á fjallstoppi eða undir yfirborði jarðarinnar? 10 kínversk pör völdu það síðastnefnda og giftu sig í 300 metra djúpum námugöngum. "Að giftast manninum sem ég elska á vinnustað hans hefur mikla merkingu fyrir mér." sagði ein brúðurin og bætti síðan við að hún hefði viljað einstakt brúðkaup en viðurkenndi að þetta hefði ekki verið henni efst í huga.

Námuiðnaðurinn í Kína er einn sá hættulegasti í heimi og nær daglega deyja námuverkamenn í slysum og ákváðu því yfirmenn námunnar að gifta tíu starfsmenn sína til þess að bæta ímynd námna um allt Kína. Hafa þeir þegar sótt um í heimsmetabók Guinness fyrir stærsta fjöldabrúðkaup haldið neðanjarðar.