Drogba vill enda ferilinn hjá Chelsea

Fílabeinsstrendingurinn Didier Drogba viðurkennir að hann hafi eitt sinn íhugað að fara frá Englandsmeisturum Chelsea, en segist nú vilja enda ferilinn hjá félaginu. Drogba hefur skorað 14 mörk á tímabilinu og þar af tvær þrennur.

"Ég er orðinn 28 ára gamall og er að hugleiða að enda ferilinn hérna hjá Chelsea, ef það er það sem stuðningsmennirnir vilja heyra. Einu sinni vildi ég fara frá félaginu, en mér líður orðið vel á Englandi. Sem atvinnumaður í knattspyrnu hef ég ákveðið að setja mínar eigin þarfir framar þörfum annara, en það sem vegur þyngst nú er sá stuðningur sem ég hef fengið frá knattspyrnustjóranum.

Þá á ég góða vini í liðinu og stuðningsmennirnir hérna eru frábærir. Sérhver leikmaður vill spila þar sem hann fær viðurkenningu fyrir sörf sín og það fæ ég hjá Chelsea," sagði Drogba og bætti því við að hann hafi verið staðráðinn í að leggja enn harðar að sér eftir að hann skrifaði undir nýjan samning við félagið fyrir skömmu.