Hrósaði Wayne Rooney

Sam Allardyce átti ekki til orð yfir frammistöðu framherjans Wayne Rooney í dag þegar Manchester United rassskellti Bolton á útivelli 4-0. Rooney skoraði þrennu í leiknum og Allardyce viðurkenndi að sínir menn hefðu ekki átt möguleika á að stöðva hann.

"Wayne Rooney sannaði án efa að hann er besti enski leikmaðurinn í úrvalsdeildinni. Hann átti sannarlega skilið að skora þrennu í dag og með þessu held ég að hann hafi troðið endanlega upp í fólk sem var búið að afskrifa hann. Fyrir utan þriðja markið hans áttu mínir menn bara ekki möguleika á því að stöðva hann, en fyrstu tvö mörkin hans voru mörk skoruð af manni með einstaka hæfileika," sagði Stóri-Sam.