Rooney skoraði þrennu í stórsigri United

Manchester United er komið aftur á toppinn í ensku úrvalsdeildinni eftir frábæran 4-0 útisigur á Bolton í dag þar sem Wayne Rooney undirstrikaði endurkomu sína með þrennu. Liverpool vann 3-1 sigur á Aston Villa og Arsenal varð að gera sér að góðu jafntefli við Everton á heimavelli sínum.

Liverpool vann auðveldan sigur á Aston Villa 3-1 þar sem Kuyt, Crouch og Garcia skoruðu fyrir þá rauðu, Portsmouth vann Reading sömuleiðis 3-1 þar sem Brynjar Björn Gunnarsson skoraði sjálfsmark fyrir Reading. Arsenal og Everton skildu jöfn 1-1 á Emirates, Wigan lagði Fulham 1-0 á útvelli með marki frá Camara en Heiðar Helguson kom þar ekki við sögu. Loks gerðu Watford og Tottenham markalaust jafntefli í hundleiðinlegum leik.