Heyrði byssuskot og þyt í byssukúlum

Skotið var af riffli að manni við Óbrynnishóla við Hafnarfjörð í gærkvöldi, en eins og nærri má geta er meðferð skotvopna bönnuð á svæðinu.

Óbrynnishólar eru rétt við Krísuvíkurveginn rétt við landarmörk Grindavíkur og Hafnarfjarðar. Maður sem hafði samband við NFS keyrði út af Krísuvíkurveginum í gær til að að sýna syni sínum lítið gil sem þar er en varð í staðinn fyrir óskemmtilegri reynslu rétt eftir að fjölskyldan steig út úr bílnum. Hann heyrði byssuhvell og þyt í byssukúlum rétt yfir höfði sér.

Manninum sem var dauðbrugðið kom fjölskyldunni upp í bíl og keyrði af stað því símasamband er ekki á staðnum. Hann hringdi í lögreglu og undrast að hafa ekki mætt lögreglubílum með blikkandi ljós á leið sinni til baka. Ummerki um nýlegar skotæfingar eru á svæðinu en þar er meðferð skotvopna bönnuð þó hún sé leyfileg skammt frá.

Maðurinn gat gefið lögreglu upplýsingar um bíl sem lagt var skammt frá. Lögreglan í Hafnarfirði segir samband hafa verið haft við eiganda bílsins sem ekki gat veitt upplýsingar um ferðir hans á þessum tíma. Bíllinn hafði verið í láni og átti lögreglan eftir að ná tali af þeim sem var á bílum.