Loka hæð vegna myglu á sjúkra­húsinu

Í byrjun mars var ákveðið að taka sýni í húsnæði Sjúkrahússinsu á Akureyri (SAk) á Kristnesi vegna gruns um að þar væru rakaskemmdir. Starfsfólk var byrjað að finna fyrir einkennum.

Vöxtur myglusveppa var staðfestur með sýnatöku og fannst hann helst í rými starfsfólks, skrifstofum, fundaherbergjum og geymslum. Einnig fannst myglan í rými sem nýtt er í þjónustu við skjólstæðinga í stuttan tíma í einu.

Ráðist var í sýnatökur víðar í byggingunni til að rannsaka umfang vandans, sem virðist vera hvað mestur á jarðhæðum. 

„Einni hæð hefur verið lokað vegna þessa og þjónusta flutt annað. Enn sem komið er hefur ekki verið tekin ákvörðun um að ráðist verði í frekari lokanir eða að draga úr þjónustu vegna þessa. Hins vegar hefur starfsfólk þurft að sýna mikla útsjónarsemi til að tryggja þjónustu á Kristnesi og fyrir það ber að þakka,“ segir í tilkynningu frá spítalanum.

Endurhæfing og öldrunarlækningar Sjúkrahússins á Akureyri eru til húsa á Kristnesspítala sem er í Eyjafjarðarsveit. Um síðustu áramót var sjö daga plássi í endurhæfingu á spítalanum lokað vegna manneklu en manna þurfti átta stöðugildi til að halda starfseminni óbreyttri.

Seinni hluta árs 2024 fannst einnig mygla í húsnæði sjúkrahússins sem er inni á Akureyri. Flytja þurfti hluta starfseminnar í annað húsnæði á meðan unnið var að viðgerðum.