Ég vil spila með Henry

Samuel Eto´o, framherji Barcelona, segist ólmur vilja spila með Thierry Henry í framlínu liðsins ef svo færi að sá franski gengi í raðir Barcelona í sumar og segir þá tvo vera góða vini.

Þær raddir gerast æ háværari sem segja að Henry yfirgefi herbúðir Arsenal í sumar og gangi þá til liðs við spænsku meistarana. "Við Titi (Henry) erum vinir og tölum oft saman í síma," sagði Eto´o á blaðamannafundi fyrir leik liðanna í úrslitum meistaradeildarinnar annað kvöld. "Það er ekki mitt mál að ákveða hvort hann kemur hingað eða ekki, en ég veit að við gætum vel spilað saman ef svo er. Ég held að fjölmiðlar séu bara að reyna að búa til spennu á milli okkar, en það þýðir ekkert. Við erum vinir og ég yrði ánægður ef hann kæmi til liðs við okkur," sagði Kamerúninn.