McClaren vill klára dæmið með stæl

Juande Ramos, þjálfari Sevilla frá Spáni, segist búast við erfiðum leik þegar lið hans mætir Middlesbrough í úrslitaleik Evrópukeppni félagsliða annað kvöld, en það verður einmitt síðasti leikur McClaren sem stjóri Middlesbrough. Leikurinn verður sýndur í beinni útsendingu á Sýn.

"McClaren er fagmaður í alla staði og nú hefur honum verið fengin ný og mikil ábyrgð," sagði Ramos og vísaði til ráðningar McClaren í stöðu landsliðsþjálfara Englendinga. "Ég er viss um að McClaren mun ná öllu því besta út úr liði sínu í leiknum, því auðvitað vill hann ljúka keppni með sigri," sagði Ramos, sem væntanlega getur teflt fram sínu sterkasta liði annað kvöld, þó framherjinn Freddy Kanoute sé eitthvað tæpur vegna fótameiðsla.