Við viljum enga Beckham-týpu í stað Ballack

Felix Magath er alveg með það á tæru hvernig leikmann Bayern Munchen þurfi til að fylla skarð Michael Ballack í liðinu ef hann fer til Chelsea í sumar eins og altalað er. Magath segist ekki þurfa neinn David Beckham í lið Bayern, heldur baráttuhund sem búi yfir sæmilegum hæfileikum.

Bayern hefur verið orðað við nokkra leikmenn undanfarið og á meðal þeirra eru þeir Mark Van Bommel hjá Barcelona, Daniel Van Buyten hjá Hamburg, Lukas Podolski hjá Cologne og Tim Borowski hjá Bremen.

"Við munum hvað sem öðru líður þurfa að breyta nokkuð um leikaðferð, en ég er bjartsýnn á að við náum að landa til okkar mönnum sem geta hjálpað okkur. Við höfum þó báðar fætur á jörðinni og gerum okkur grein fyrir því að við erum ekkert að fara að kaupa neinn Ronaldinho," sagði Magath.

"Við þurfum engar Beckham-týpur í liðið, heldur er mikilvægast að fá mann með leiðtogahæfileika sem blandast vel inn í liðið og hann þarf auðvitað að vera góður knattspyrnumaður," bætti hann við.