Tapið var mér að kenna

Steven Gerrard, fyrirliði Liverpool, viðurkennir að tapið gegn Arsenal í ensku úrvalsdeildinni í dag hafi verið sér að kenna. Gerrard gaf Arsenal sigurinn á silfurfati eftir að hann renndi boltanum til baka beint í lappirnar á Thierry Henry sem skoraði auðveldlega.

"Við hefðum geta stolið góðu stigi á Highbury í dag, en í staðinn förum við tómhentir heim af því ég gerði asnaleg klaufamistök. Mér datt í hug að tefja leikinn aðeins með því að renna boltanum aðeins aftur á markvörðinn, en ég sá ekki að Henry faldi sig á bak við miðverðina. Hann er einmitt síðasti maðurinn sem þú vilt að komist einn á móti markverðinum," sagði Gerrard niðurlútur - en vikan hefur sannarlega ekki verið góð fyrir Liverpool sem féll út úr meistaradeildinni og tapaði í dag mikilvægu stigi í baráttunni um annað sætið í úrvaldeildinni.