Viðskiptahallinn við útlönd 164,1 milljarður króna í fyrra

Viðskiptahallinn við útlönd nam 53,1 milljarði króna á fjórða ársfjórðungi síðasta árs samkvæmt bráðabirgðauppgjöri Seðlabanka Íslands. Á sama tímabili 2004 var viðskiptahallinn 35,2 milljarðar króna. Viðskiptahallinn á öllu síðasta ári nam samtals 164,1 milljarði króna en var 85,3 milljarðar króna árið áður.

Útflutningur vöru og þjónustu var 12,6 prósentum meiri á árinu 2005 en árið á undan og innflutningur var um 38,2 prósentum meiri en á fyrra ári reiknað á föstu gengi, að samkvæmt uppgjöri Seðlabankans.

Þá nam halli á vöruskiptajöfnuði við útlönd 93 milljörðum króna auk þess sem hallinn á þjónustujöfnuði nam 40,2 milljörðum króna á síðasta ári.

Jöfnuður þáttatekna var neikvæður um 29,1 milljarð króna á síðasta ári en var 33,2 milljarðar fyrir tveimur árum. Minni halli þáttatekna skýrist af auknum tekjum af beinum fjárfestingum erlendis þrátt fyrir aukna vaxtabyrði erlendra skulda. Rekstrarframlög til erlendra aðila voru 1,7 milljarðar króna meiri en framlög erlendis frá til innlendra aðila á árinu 2005.