Orkla til sölu

Norska, fjölmiðlafyrirtækið Orkla Media, sem rekur meðal annars dönsku blöðin Berlingske Tidene, BT og Weekendavisen, er til sölu. Að því er fram kemur á norska fréttavefnum NTB hefur stjórn félagsins ákveðið að hlusta á tilboð í samsteypuna í heild sinni eða að hluta.

Fram kemur í tilkynningu sem vitnað er til að áhugasömum kaupendum sé hér með boðið að bjóða í félagið.

Fram hefur komið að Dagsbrún, móðurfélag 365 miðla, hafi sýnt Orkla áhuga og að eigendur norska blaðsins Dagbladet hafi ákveðið að bjóða í félagið.

Aðalfundur Dagsbrúnar stendur nú yfir og ætla má að þessar fréttir frá stjórn Orkla Media beri þar á góma.