Ferdinand tryggði Man Utd sigur á Liverpool

Rio Ferdinand tryggði Manchester United síðbúinn 1-0 sigur á Liverpool í stórviðureign liðanna í ensku úrvalsdeildinni í knattspyrnu á Old Trafford nú síðdegis. Sigurmarkið skoraði varnarmaðurinn með skalla á 90. mínútu eftir sendingu frá Ryan Giggs.

Leikurinn var nokkuð jafn en gestirnir frá Liverpool áttu þó tölfræðilega séð meira í leiknum. Heimamenn voru 42% leiksins með boltann gegn 58% Liverpool-manna sem áttu 11 skot að marki Man Utd (7 á markið) gegn 7 skotum Man Utd (4 á markið).

Djibril Cisse fékk eitt besta tækifæri Liverpool til þess að skora þegar hann skaut yfir markið af stuttu færi á 63. mínútu. Sigurmark Ferdinands kom þegar 2 sekúndur voru eftir af venjulegum leiktíma en þremur mínútum var svo bætt við.

Man Utd náði með sigrinum að minnka forskotið á topplið Chelsea niður í 14 stig og eru enn í 2. sæti, nú fjórum stigum á undan Liverpool sem eru í 3. sæti en eiga tvo leiki til góða.