Íslendingarnir hleyptu miklu lífi í félagið

Lennart Käll tók við forstjórastarfinu hjá Ticket fyrir þremur og hálfu ári, en hann starfaði áður á fjármálamarkaði. Breytingar þær sem urðu á eignarhaldi og stjórnun félagsins með innkomu Fons styrktu fyrirtækið og hleyptu miklu lífi inn í æðstu stjórn fyrirtæksins.

 „Ég hef unnið með þremur stjórnum en sú sem er starfandi nú er ólík hinum að því leyti að nokkrir stjórnarmannanna hafa ríkra hagsmuna að gæta sem beinir eigendur. Aðrir stjórnarmenn, sem eru frá Noregi og Svíþjóð, búa einnig yfir mikilli reynslu þannig að til verður öflug blanda. Ólíkur bakgrunnur stjórnarmanna gerir stjórnunarbraginn öðruvísi og skemmtilegri þar sem unnið er af kappi að efla félagið áfram.“

Hraði og skjót ákvörðunartaka er annað sem einkennir þær breytingar sem orðið hafa á rekstri Ticket eftir að Íslendingarnir keyptu þar stóran hlut, segir forstjórinn. Liggur það kannski í hlutarins eðli þegar hagsmunir stjórnarmanna og fyrirtækisins fara vel saman. Þeir vilji keyra í gegn hugmyndir sem áður fyrr voru að velkjast í húsinu í mánuði eða ár og urðu aldrei að veruleika.

Áhersla á sölumennsku

Lennart segir að reynsla sín úr bankakerfinu nýtist vel í ferðaskrifstofubransanum. Fyrirtækið hafi lagt áherslu á að efla sölu og markaðsstarf og hafi nýlega verið verðlaunað fyrir besta heimasíðu þeirra fyrirtækja og samtaka sem starfa innan sænska ferðamannaiðnaðarins. Þetta tvennt, öflugt sölustarf og góð og aðgengileg heimasíða, hafi ráðið miklu um innri vöxt Ticket.

Netið er jafn mikilvægt í sölunetinu og skrifstofurnar og síminn. Þegar Lennart settist í forstjórastólinn hafi viðskiptavinurinn þurft að velja 107 aðgerðir til að bóka ferð, nú þurfi hann aðeins að velja sex aðgerðir. „Við leggjum mikið upp úr því að hafa góðan gagnagrunn. Á skrá hjá okkur eru 1,2 milljónir viðskiptavina sem við getum náð til með fljótlegum hætti og gert þeim góð tilboð í sumarfríið eða borgarferðina.“

Miklu máli skipti að fá nýja viðskiptavini til liðs við félagið því reynslan hafi sýnt að viðskiptavinurinn leiti aftur til þeirrar ferðaskrifstofu sem seldi honum síðustu ferðina. „Þar sem allir fara á annað borð í frí þá skiptir það auðvitað máli hvar fólk bókar sig. Hvort sem maður vinnur í banka eða við að selja ferðir þá þarftu að hafa góða vöru og góða sölumenn. Ef maður nær að gera starfsmenn meðvitaða fyrir sölumennsku þá gerast hlutirnir hratt,“ segir Lennart Käll.

Mikil tækifæri fyrir hendiSegja má að markmið Ticket um að verða stærsti aðilinn á norrænum ferðaskrifstofumarkaði hafi í raun og veru náðst. Hins vegar er markaðshlutdeild fyrirtækisins ekki nema um fjórtán prósent af heildarkökunni í Svíþjóð og ellefu prósent í Noregi. Starfsstöðvar eru engar í Danmörku og Finnlandi og telur Lennart, líkt og Matthías Páll, að fyrirtækið og markaðurinn í heild eigi mikið inni. Eftir yfirtökuna á MZ Travel, sem veltir um tíu milljörðum króna á ári, er Ticket í fyrsta skipti í þeirri aðstöðu að geta bæði þjónað einstaklingum og þeim er ferðast í viðskiptaferðum. „Þetta er fyrsti leikur okkar í að verða enn þá stærri í Skandinavíu. Í framhaldinu vænti ég þess að við kynnum kaup á öðru stóru fyrirtæki á allra næstu dögum.“