EGO fær viðurkenningu Orkuseturs

Orkusetur veitir EGO sjálfsafgreiðslustöðvunum viðurkenningu fyrir lofsvert frumkvæði að því að draga úr eldsneytisnotkun. "Framlag EGO felst í því að bjóða ökumönnum tölvustýrða mælingu og loftjöfnun á hjólbörðum bifreiða á öllum EGO stöðvunum. Hin nýja tegund tækjabúnaðar auðveldar ökumönnum til muna að fylgjast með loftþrýstingi, fínstilla hann og jafna," segir í tilkynningu sem Sigurður Ingi Friðleifsson, framkvæmdastjóri Orkuseturs, sendi vegna viðurkenningarinnar.

"Orkunotkun landsmanna fer sífellt vaxandi og því skiptir sú aðhaldsþjónusta sem hér um ræðir miklu máli. Bætt nýting á eldsneytisnotkun bifreiða er jafnframt í takt við aðgerðaáætlun Evrópusambandsins sem skila á 20 prósenta orkusparnaði á næstu 15 árum," segir Sigurður Ingi og kveður að lauslega áætlað megi gera ráð fyrir að með bættri jöfnun lofts í hjólbörðum mætti spara íslensku þjóðarbúi um 500 milljónir króna á ári og minnka útblástur gróðurhúsalofttegunda um 12 þúsund tonn.

"Orkusetur óskar EGO til hamingju með gott framtak og minnir ökumenn á að réttur loftþrýstingur í hjólbörðum getur dregið úr eldsneytisnotkun bifreiðar um allt að 10 prósent, auk þess að draga úr mengun og auka öryggi í umferð. Það munar um minna," segir Sigurður Ingi.