Asíska flugfélagið Singapore Airlines hefur pantað 29 farþegaflugvélar frá Airbus. Um er að ræða 20 A350 XWB vélar og níu A380 risaþotur, sem eru stærstu farþegaflugvélar í heimi. Kaupvirði þotanna er talið nema jafnvirði 555 milljarða íslenskra króna.
Þetta er fyrsti samningur Airbus við flugfélög um kaup á A350 vélinni, sem er endurbætt flugvél af sömu gerð.
Singapore Airlines keypti 20 Boeing 787-9 farþegavélar fyrir jafnvirði 334 milljarða íslenskra króna í síðasta mánuði.
Samningur Singapore Airlines þykir einkar jákvæður fyrir Airbus og EADS, móðurfélag flugvélaframleiðandans, en fyrirtækið hefur orðið fyrir miklum skakkaföllum vegna framleiðslutafa á risaþotunni. Tveir æðstu stjórnendur EADS hafa þurft að taka poka sinn vegna þessa auk þess sem gengi hlutabréfa í fyrirtækinu hefur lækkað um fjórðung frá því í mars þegar greint var frá töfunum.
Singapore Airlines fær fyrstu A380 þoturnar undir lok ársins.
