Ekki með gegn Englendingum

Sænski framherjinn Zlatan Ibrahimovic verður ekki með Svíum í leiknum gegn Englandi í lok riðlakeppninnar á heimsmeistaramótinu í Þýskalandi. Ibrahimovic verður frá í fimm daga en Magnus Forsblad, læknir sænska liðsins, staðfesti þetta í gær.

Við vonumst til þess að hann nái sér á fimm eða sex dögum. Við fundum tognun í vöðva á honum, en það jákvæða er að tognunin gæti varla verið minni. Þetta er þó ekki tengt fyrri nárameiðslum hjá Zlatan, sagði Forsblad.

Marcus Allback, sem kom inn á sem varamaður í fyrstu tveimur leikjum Svía í riðlinum, mun að öllum líkindum spila í framlínunni með Henrik Larsson en leikurinn verður háður á þriðjudaginn.