Býður á völlinn á Akureyri

Leikur Íslands og Danmerkur á þriðjudaginn fer fram á Akureyri en það er fyrir tilstilli HSÍ og Flugfélags Íslands sem býður öllum Akureyringum á leikinn. 1500 miðar eru í boði og er hægt að nálgast þá á skrifstofu flugfélagsins á Akureyrarflugvelli frá klukkan 10.00 í dag.

Þetta er mikil ánægja fyrir okkur að koma að þessu verkefni. Við höfum komið að þessu með landsliðinu undanfarin ár og það er gaman að geta stutt landsliðið sem slíkt og ekki síst að geta stuðlað að því að handboltinn eflist á landsbyggðinni, sagði Árni Gunnarsson, framkvæmdastjóri Flugfélags Íslands, við Fréttablaðið í gær. Aðrar íþróttagreinar hafa ekki verið jafn duglegar að þessu og við hvetjum bara aðra til að taka HSÍ sér til fyrirmyndar.