Guðjón smalar fólki á völlinn

Guðjón Þórðarson, knattspyrnustjóri Notts County, hefur sent út skilaboð til stuðningsmanna liðsins á heimasíðu félagsins, þar sem hann hvetur alla sem vettlingi geta valdið til að mæta á völlinn á laugardaginn til að verða vitni að toppslag í deildinni. "Það er afar mikilvægt að við fáum marga áhorfendur á laugardaginn, við erum á toppi deildarinnar og liðið þarf stuðning ef það á að fylgja eftir þessu góða gengi undanfarið," sagði Guðjón á heimasíðunni. "Stuðningsmenn liðsins geta virkað sem tólfti maðurinn inni á vellinum og stuðningur margra áhorfenda er liðinu ómetanlegur," sagði Guðjón, sem hefur stýrt liði Notts County til sigurs í öllum heimaleikjum liðsins það sem af er tímabilinu. County tekur á móti Chester City á laugardaginn, en það er einmitt í toppbaráttunni líka og því er ljóst að hart verður barist á Meadow Lane á laugardag.