Enn meiri bið á endurkomu Bryants

Nú er ljóst að meiðsli Kobe Bryant hjá Los Angeles Lakers í NBA-körfuboltanum eru verri en fyrst var áætlað. Bryant, sem nú þegar hefur misst af 7 leikjum, verður að öllum líkindum ekki leikfær fyrr en um miðjan febrúar og gæti því misst af 10 leikjum til viðbótar. "Þetta var slæm tognun en hann hefur engu að síður náð miklum bata. Við vonumst til að fá hann til baka sem fyrst," sagði talsmaður Lakers-liðsins. Bryant hefur verið aðaldriffjöður liðsins og hafa meiðslin komið sér afar illa fyrir Lakers sem hefur tapað fjórum af þeim sjö leikjum sem Bryant hefur verið fjarverandi.