Nútímalegur hallarstíll

Nú þykir mjög flott að hafa kristalsljósakrónu á heimilinu og setja hana inn í mjög nútímalegt umhverfi þar sem viktorískum og módernískum stíl er blandað saman. Verslunin Exó í Fákafeni sem að jafnaði býður upp á mjög stílhrein og nútímaleg ljós hefur nánast á einni nóttu breyst í höll þar sem allt hefur fyllst af kristalsljósakrónum. Reyndar hefur Exó haft þessar ljósakrónur í sölu í um eitt og hálft ár en nú í desembermánuði var úrvalið aukið til muna. Ljóskrónurnar eru úr Bohemian kristal frá Tékklandi annarsvegar og úr Swarovski kristall frá Austurríki hinsvegar. Bohemian kristalinn þekkja margir en Swarovski kristallinn er bjartari og hreinni en jafnframt helmingi dýrari, en Swarovski er mjög þekktur fyrir skartgripi og skrautmuni. Vinsælastar eru ljósakrónurnar sem eru 4 til 6 ljósa en sú stærsta ber 21 ljós og þarf talsvert stórt rými til að hún fái að njóta sín til fulls. Í stíl við ljósakrónurnar fékk Exó framleiðendur Bohemian kristalsins til að búa til sérstaka kertastjaka og voru þeir einungis framleiddir fyrir Exó. Vinsældir þeirra voru gríðarlegar fyrir jólin þannig að þeir seldust upp en von er á nýrri sendingu í febrúar.