Hafmeyjar í sjávarháska

Inga Björg Stefánsdóttir söngkona á málverk inni í stofu hjá sér sem hún man eftir frá því að hún man fyrst eftir sjálfri sér: "Myndin er nokkurskonar sjávarlandslag og á henni eru marglyttur, hafmeyjar, kastalar og skip. Hún er eftir Aðalbjörgu Sófaníasdóttur frá Loðmundarfirði sem var gift ömmubróður mínum og var mikið náttúrubarn. Amma og afi áttu myndina fyrst en amma gaf svo mömmu og pabba hana þegar þau fóru að búa þannig að ég hef alltaf haft hana fyrir augunum. Mér fannst báturinn sem flýtur á hafinu á myndinni alltaf vera Aðalbjörgin sem er bátur sem afi minn átti og pabbi á núna. Og trúði því auðvitað eins og nýju neti að það væru hafmeyjar neðansjávar sem pössuðu upp á að ekkert kæmi fyrir Aðalbjörgina okkar. Á stríðsárunum bjargaði afi tæplega tvöhunduð mönnum úr breskum tundurspilli upp í Aðalbjörgina og ég var viss um að hafmeyjarnar hefðu hjálpað honum." Þegar Inga kom svo heim úr námi og keypti sér íbúð var hún að gramsa í geymslunni hjá foreldrum sínum og fann myndina. "Mér fannst ég verða að hafa hana heima hjá mér. Myndin er svo full af lífi, skemmtilega naíf og alltaf hægt að finna eitthvað nýtt í henni. Á morgnana sit ég með sonum mínum við kertaljós og við horfum á myndina áður en við förum út í daginn. " Inga Björg Stefánsdóttir hefur ekki setið auðum höndum síðan hún flutti heim og tók nú síðast þátt í uppfærslu Sumaróperunnar á Happy End. Fyrir höndum eru tónleikar með Hrólfi Sæmundssyni og Valgerði Guðnadóttur í Iðnó sunnudaginn 10.október þar sem eflaust má heyra sírenusöng hafmeyjanna ef grannt er hlustað.