Kaupfélag ásælist sparisjóð

Valdabarátta hefur staðið í um ráðandi hlut í Sparisjóði Hólahrepps á Sauðarkróki um árabil og nú er svo komið að gömlu stofnfjáreigendurnir eru komnir í minnihluta en Kaupfélag Skagfirðinga ásamt stjórnendum félagsins og dótturfélaga eru með meirihluta sem þó er ekki virkur þar sem þeir eiga aðeins tvo fulltrúa af fimm í stjórn, þá Jón Eðvalds Friðriksson, framkvæmdastjóra Fiskiðjunnar Skagfirðings og Sigurjón Rúnar Rafnsson aðstoðarkaupfélagsstjóra KS. Alls eru yfir 10 stjórnendur kaupfélagsins stofnfjáreigendur auk þess að kaupfélagið sjálft keypti stofnhluti fyrir rúmar 8 milljónir króna en alls er stofnfé sparisjóðsins 22 milljónir króna. Kristján í skotlínunni Eldri stofnfjáreigendur telja víst að ætlun kaupfélagsmanna sé að ná sparisjóðnum í því skyni að stofna til bankarekstrar fyrir VÍS og önnur fyrirtæki sem kennd eru við gamla Sambandið. Upp úr sauð í seinustu viku þegar meirihluti stjórnar ákvað að losa sig við Kristján Hjelm sparisjóðsstjóra. Kristján hefur barist harkalega gegn kaupfélagsvaldinu og viljað forða sparisjóði sínum frá því að falla í hendur Þórólfs og hans manna. Þetta varð til þess að honum var gefinn kostur á að hætta í góðu eða verða úthýst annars. Þetta varð til þess að tveir af fimm stjórnarmönnum Sparisjóðsins, Sverrir Magnússon varaformaður og Valgeir Bjarnason sendu frá sér harðorða yfirlýsingu í gær: "Við undirritaðir stjórnarmenn í Sparisjóð Hólahrepps þökkum Kristjáni Hjelm, sparisjóðsstjóra fyrir trúmennsku og vel unnin störf í þágu Sparisjóðsins. Jafnframt hörmum við að hann hafi neyðst til að víkja úr starfi af óviðráðanlegum ástæðum. Kristján hefur reynst frábær starfsmaður og við hefðum gjarnan viljað njóta starfskrafta hans áfram. Við óskum honum og konu hans velfarnaðar á nýjum starfsvettvangi". Sverrir og Valgeir eru fulltrúar gömlu stofnfjáreigendanna. Sverrir varaformaður segist ekki vilja tjá sig frekar um starfslok Kristjáns sparisjóðsstjóra og segir það vera hlutverk Magnúsar að útskýra þau. "Magnús Brandsson á að svara fyrir þessi mál. Sparisjóðurinn hefur vaxið mikið undir forystu Kristjáns Hjelm. Hann hefur verið mjög vinsæll á meðal fólksins," segir Sverrir. Oddamaður í stjórn Sparisjóðsins og formaður er Magnús Brandsson, sparisjóðsstjóri á Ólafsfirði, sem settur var inn í stjórnina á sínum tíma af Sambandi sparisjóða til að vera á milli stríðandi afla kaupfélagsmanna og eldri stofnfesta. Magnús hafði um það forgöngu að knýja Kristján til þess að hætta störfum en segir það ekki tengjast stríðandi fylkingum innan sparisjóðsins. 100 ára banki Upphaf sparisjóðs Hólahrepps má rekja allt aftur til þess að Hlöðubyggingarsjóður var stofnaður í Skagafirði árið 1900. Sjóðnum var breytt í sparisjóð árið 1905 og hefur starfað allar götur síðan. Grunur gömlu stofnfjárfestanna er sá að kaupfélagsmenn ætli að sölsa sparisjóðinn undir VÍS. Einn viðmælenda DV orðaði það sem svo að þetta yrði "rán aldarinnar" því bankaleyfi kosti hátt í 500 milljónir króna en Kaupfélag Skagfirðinga hefði aðeins lagt í kaupin á stofnfjárhlutum rúmar 8 milljónir króna sem þýddi þá að þeir myndu hagnast 50 falt á yfirtöku. Þeir sem vilja verja sparisjóðinn segja að kaupfélagsmennirnir bíði þess aðeins að ná fram kosningum til að knýja fram nýjan meirihluta. Síðan muni sparisjóðurinn falla í gin VÍS.rt@dv.is