Björn frá út tímabilið og Jakob með brjósklos

Björn Kristjánsson leikur ekki meira með Íslandsmeisturum KR í körfubolta á þessu tímabili. Hann þarf að gangast undir aðgerð á mjöðm. Þetta kemur fram á heimasíðu KR.

Björn hefur glímt við meiðsli í mjöðm í rúmt ár og fer í aðgerð á mjaðmakúlu á næstunni. Búist er við að hann verði frá í 4-5 mánuði.

Björn lék aðeins þrjá leiki með KR í Domino's deild karla í vetur. Í þeim var hann með 8,0 stig, 3,0 fráköst og 2,0 stoðsendingar að meðaltali.

Þá hefur Jakob Örn Sigurðarson verið greindur með brjósklos. Samkvæmt heimasíðu KR festist hann í bakinu í jólafríinu. Óvíst er hversu lengi Jakob verður frá.

Jakob kom til KR frá Borås Basket í Svíþjóð fyrir tímabilið. Hann er með 12,7 stig, 2,8 fráköst og 2,7 stoðsendingar að meðaltali í leik.

Jón Arnór Stefánsson og Kristófer Acox eru enn frá hjá KR; Jón Arnór vegna meiðsla og Kristófer vegna veikinda.

KR vann þriggja stiga sigur á Grindavík, 91-94, eftir framlengingu í fyrsta leik sínum eftir áramót í gær.

Króatinn Dino Cinac lék sinn fyrsta leik fyrir KR í gær. Hann skoraði tíu stig og tók sex fráköst.

Eyjólfur Ásberg Halldórsson lék einnig sinn fyrsta leik fyrir KR í nokkur ár. Hann skoraði fimm stig, öll í framlengingunni.