Utan vallar: Fólk með ADHD má spila í­þróttir

Sú staðreynd að Veigar hafi farið í bann fyrir notkun ADHD-lyfja þýðir ekki að allir þeir sem eru með ADHD fái bann fyrir slíkt. Veigar tók inn lyf án þess að vera með greiningu og án þess að hafa undanþágu frá Lyfjaeftirliti Íslands.

Raunar eru fjölmargir íþróttamenn á Íslandi, og víða um heim, með ADHD-greiningu og taka inn lyf sem innihalda efni á bannlista lyfjastofnunarinnar WADA (World Anti-Doping Agency). Flestöll ADHD-lyf teljast til stimúlanta sem almennt eru bannaðir sökum þess að þeir bæti frammistöðu í íþróttum.

Efnin methylphenidate (sem er í ADHD-lyfjunum Ritalin, Concerta og Daytrana), amfetamín og dextroamphetamine (sem eru í Adderall og Dexedrine) og lisdexamfetamine (sem er í Vyvanse) eru allt dæmi um efni á bannlista WADA sem eru í ADHD-lyfjum sem fjölmargir víða um heim taka inn dagsdaglega.

Íþróttamenn sem taka þau efni inn þurfa að skila inn læknisvottorði og fá sér til gerða undanþágu frá Lyfjaeftirliti Íslands og færu því ekki í bann ef viðkomandi efni finnst í sýni þeirra, innan þeirra marka sem undanþágan segir til um.

Önnur dæmi um slíkar undanþágur gætu verið íþróttamenn sem glíma við blóðþrýstingsvandamál, eða æða- eða hjartasjúkdóm og þurfa að taka inn beta-blockera sem lækka blóðþrýsting og hægja á hjartslætti. Slík lyf eru einnig á bannlista WADA en íþróttamenn geta tekið inn ef þeir hafa til þess undanþágu.