Leigubremsan „aug­ljós­lega mjög heimsku­leg“

Ásgeir lét ummælin falla á blaðamannafundi vegna vaxtaákvörðunar peningastefnunefndar í morgun. Jón Bjarki Bentsson, aðalhagfræðingur Íslandsbanka, spurði hann álits á leigubremsunni og sagði standa til að „sjanghæja“ henni í gegnum þingið.

Þar var vísað til frumvarps Ragnars Þórs Ingólfssonar, félags- og húsnæðismálaráðherra, um breytingar á húsaleigulögum. Samkvæmt því mættu reglubundnar hækkanir húsaleigu á samningstíma aðeins eiga sér stað á tólf mánaða fresti og ekki fara umfram hækkun vísitölu neysluverðs til verðtryggingar.

Segir verðhömlur ekki leysa skortinn

Í viðtali við fréttastofu að fundinum loknum segir Ásgeir að tilraunir til að leysa skort á markaði með verðhömlum hafi verið gerðar margsinnis.

„Sú aðgerð að ætla að leysa vandamál skorts á markaði með því að með því að festa verðið, það er svona búið að reyna það mörgum sinnum síðustu aldirnar,“ segir Ásgeir.

Hann segir það meðal þess fyrsta sem nemendur læri í grunnnámi í hagfræði að slíkt leysi ekki vandann.

„Þú leysir ekki vandamál með því að með því að festa verðið með lögum eða einhverju slíku.“

Lausnin felist að hans mati í að auka framboð og liðka fyrir markaðnum. Spenna á fasteignamarkaði hafi að hluta stafað af of litlu framboði og fólksfjölgun, en nú sé staðan að breytast.

„Núna erum við að sjá mikið umframboð á fasteignamarkaði,“ segir Ásgeir og telur markaðinn vera að komast í jafnvægi.

Vonar að fallið verði frá henni

Spurður hvort hann mælist til þess að ríkisstjórnin falli frá leigubremsunni svarar Ásgeir:

„Já, ég bara vona það, þannig að ég tel að þetta gæti jafnvel gert illt verra, já, ég tel að þetta muni ekki vera til þess að lækka leiguverð þegar þarna er litið til lengri tíma.“

Ragnar segir bremsuna verja heimilin

Ragnar Þór hefur sagt leigubremsuna eiga að verja heimilin gegn stjórnlausum hækkunum og óöryggi. Í framsöguræðu á Alþingi á mánudag lýsti hann henni sem sanngjarnri og málefnalegri aðgerð sem stöðvaði sjálfvirkar mánaðarhækkanir og yki fyrirsjáanleika fyrir leigjendur.

„Það er jafnframt liður í aðgerðum ríkisstjórnarinnar til að greiða fyrir því að kjarasamningar á almennum vinnumarkaði haldi,“ sagði Ragnar í framsöguræðunni.

Frumvarpið fór ekki í samráðsgátt stjórnvalda. Í greinargerð þess er sú ákvörðun skýrð með því að birting áforma og frumvarpsdraga gæti hvatt til leiguverðshækkana áður en breytingarnar tækju gildi.

Lagt er til að reglurnar taki gildi 1. júlí 2027 fyrir nýja, endurnýjaða og framlengda leigusamninga. Þær myndu einnig ná til eldri samninga um íbúðarhúsnæði sem enn væru í gildi 1. júlí 2028.