Á­kveða í kvöld hvort kjara­samningum verði sagt upp

Í tilkynningu þess efnis á vef VR segir að félagið, LÍV og Fagfélögin hafi ítrekað lagt fram tillögur að lausnum til að kjarasamningar geti haldið en Samtök atvinnulífsins hafi ekki sýnt neina viðleitni til að mæta þeirri stöðu sem launafólk sé í vegna forsendubrests kjarasamninga.

Þrír dagar til stefnu

Trúnaðarráð félagsins sé stjórninni til ráðgjafar og muni ræða stöðuna og næstu skref á fundinum, sem hefjist klukkan 17:30. Stjórn VR, sem jafnframt sé samninganefnd félagsins, fundi í kjölfarið og taki afstöðu til þess hvort segja eigi upp kjarasamningum, komi ekki til viðunandi viðbragð frá SA.

Segja verði upp samningum í síðasta lagi síðdegis næstkomandi fimmtudag, 8. október.

„Stórir hópar okkar félagsfólks hafa tekið á sig launalækkanir undanliðin tvö ár, þar sem almennar hækkanir samkvæmt kjarasamningum hafa verið undir verðbólgu og álögur hafa verið auknar á barnafólk. Þegar forsendubresturinn lá fyrir fórum við með greiningu á þessum vanda til Samtaka atvinnulífsins og óskuðum eftir hóflegum leiðréttingum fyrir okkar félagsfólk. Því var hafnað með öllu með vísan til þess að við þyrftum að hafa áfram „trú á verkefninu“. Þann 24. september sl. lögðum við fram nýjar tillögur til lausna á vandanum sem fælu í sér í forsenduákvæði sem myndu virkjast ef þessi kjararýrnun héldi áfram. Síðan eru liðnir ellefu dagar og við höfum engin viðbrögð fengið frá SA. Líklega hafa samtökin sjálf ekki trú á verkefninu,“ er haft eftir Höllu Gunnarsdóttur, formanni VR.

SA skili auðu

Þá er haft eftir henni að sveitarfélögin, sem mörg hver séu aðþrengd, hafi stigið fram og lýst yfir vilja til að leggja hönd á plóg. Ríkisstjórnin hafi sýnt á spilin og fjöldi fyrirtækja hafi nú þegar sýnt í verki vilja til að tryggja að kjarasamningar geti haldið. 

„En Samtök atvinnulífsins hafa skilað algjörlega auðu og nú eru aðeins þrír dagar til stefnu. Þannig að eina svarið sem okkar félagsfólk hefur fengið frá SA er að það eigi að halda áfram að taka á sig launalækkanir í hálft annað ár til viðbótar. Við það verður ekki unað. Því vakna spurningar um hvort SA vilji í raun og veru að kjarasamningar haldi, að minnsta kosti hafa þau ekki sýnt neinn samningsvilja eða yfirleitt mætt með lausnamiðað hugarfar.“