„Svo lengi sem ég spila þá er ég glaður“

Um var að ræða þriðja leik Íslands í C-riðli Þjóðadeildarinnar. Eftir 3-0 sigur á Lúxemborg ytra þá var annar 3-0 sigur niðurstaðan í dag. Arnar Gunnlaugsson, landsliðsþjálfari, gerði sex breytingar milli leikja.

„Mér fannst þeir sem komu inn gera ógeðslega vel. Þetta var svolítið öðruvísi leikur en úti gegn Lúxemborg. Lágum aðeins meira þar en fannst við halda vel í boltann, vindurinn gerði helling. Hefði getað skorað fleiri í fyrri hálfleik, fengum góðar stöður sem við hefðum getað nýtt betur en 3-0 sigur, það er ekki hægt að kvarta.“

Hákon Arnar átti stoðsendinguna á Orra Stein Óskarsson í fyrsta marki Íslands en fram að því hafði verið lítið að frétta.

„Ég er sammála, það tók smá tíma [að skora]. Völlurinn er ógeðslega hraður, hann er góður. Fannst við vera að reyna of mikið, ætluðum að skora í hverri einustu sókn. Svo datt það niður, við skoruðum og sigldum þessu heim.“

Hákon Arnar hefur nú spilað þrjár stöður í síðustu þremur landsleikjum. Á miðri miðjunni, út á væng og sem hluti af tveggja manna framlínu.

„Það skiptir alltaf máli en ég reyni að gera mitt besta þar sem Arnar setur mig. Svo lengi sem ég spila þá er ég glaður.“

„Auðvitað er áskorun. Þú þarft að fylgjast með 2-3 mismunandi stöðum á fundunum og fundirnir eru þó nokkrir með honum [Arnari]. Það er áskorun en ég klára það eins og alvöru maður.“

„Það má segja það. Mætti fækka þeim [fundunum] aðeins en það er búið að skila sér núna, tveir 3-0 sigrar í röð þannig að við erum að gera eitthvað rétt.“

Hákon Arnar varð fyrir smá hnjaski undir lok leiks.

„Bara þreyttur, þreytumerki. Fékk aðeins í bakið, vorum 2-0 yfir og að fá víti svo sniðugast að fara út af. Leikur eftir 3-4 daga, þetta er alvöru keyrsla og svo líka þegar maður fer út þá eigum við leik á laugardag og svo Arsenal vikuna eftir. Þetta er alvöru keyrsla fyrir mig.“

Að endingu var Hákon Arnar spurður út í komandi leik í Eistlandi.

„Kannski eru þeir að sýna þeir séu betri en heimslistinn segir, með fimm stig og ekki búnir að tapa leik. Við erum að fara á erfiðan útivöll og ætlum að fara til að vinna. Ætlum að fara út úr þessu verkefni á toppnum, verður krefjandi en það er bara fínt.“

Viðtalið má sjá í heild sinni hér að ofan.