Sögu­leg stund fyrir Viking í kvöld

Í fyrsta skipti í sögu félagsins er Viking frá Noregi að spila í Meistaradeild Evrópu. Liðið mætir Stuttgart í kvöld í einum stærsta leik félagsins frá upphafi. Bodø/Glimt spilar einnig í Meistaradeildinni á þessu tímabili og er því Noregur með tvö lið í Meistaradeildinni í fyrsta skipti síðan árið 1999.

Sebastian Hoeneß, þjálfari Stuttgart, er heillaður af norskum fótbolta og segir að lið Vikings hefði getað staðið sig vel í þýsku úrvalsdeildinni.

„Það var mjög gaman að fylgjast með norska landsliðinu í sumar á heimsmeistaramótinu. Liðið er ekki bara með Haaland heldur eru þrír eða fjórir aðrir leikmenn í hæsta gæðaflokki í stærstu deildunum. Noregur er lítið land en þrátt fyrir það er mikið af frábærum liðum. Bodø/Glimt sýndi það á síðasta ári.“

Mikil uppsveifla hefur verið í norskum fótbolta undanfarið og í norskum íþróttum almennt. Morten Jensen, þjálfari Vikings, segir ástæðuna fyrir því vera að leikmenn og þjálfarar leggi hart að sér.

„Við leggjum áherslu á okkar eigin leikstíl. Einnig hafa þjálfarar orðið betri og sérhæfðari. Það eru mun fleiri hæfir þjálfarar í Noregi bæði í landsliðum og félagsliðum,“ segir Jensen en tekur þó fram að það sé ekki sjálfsagt fyrir lið að vera í Meistaradeild Evrópu. Flest lönd vilja vera þar og það er mikil samkeppni um hvert sæti í deildinni.

Búast má við að Amin Cosic verði í leikmannahóp Vikings í kvöld og bætist þá í hóp Íslendinga sem hafa spilað í Meistaradeild Evrópu. Hann gekk til liðs við félagið í sumar frá KR og var í byrjunarliðinu þegar liðið vann Aalesund í norsku úrvalsdeildinni.