Versace-ást Villa Vill kveikjan að lagi og skúlptúr

Bresk-nígeríski rapparinn Magugu mætti á Menningarnótt, beint frá Berghain í Berlín, til að frumflytja nýtt lag hans og DJ Margeirs, „Strike A Pose (I'm Wearing Versace)“, á tónleikunum Moment.

Lagið má rekja aftur til Instagram-síðu Villa Vill en þar birtir lögfræðingurinn reglulega af sér myndir klæddur í Versace og önnur ítölsk merki, oftar en ekki í sinni eftirlætis borg, Napoli. Plötusnúðurinn DJ Margeir sá eina af myndum Villa, fylltist innblæstri og hélt til Keflavíkur.

Á Versace-skyrtu og skýlu í Keflavík

Margeir mætti í Versace-heilsulindina á Hótel Keflavík með filmuvél og Versace-skyrtu úr kvennalínu merkisins frá 1994. Hann klæddi sig þar í skýlu og skyrtuna, setti á sig naglalakk og fangaði lúkkið á filmu.

Úr varð mynd sem Margeir kallar „Rólegur Villi Vill!“ í höfuðið á fyrirmyndinni.

„Sköpunarferlið kemur sífellt á óvart og getur svo sannarlega verið alls konar. Langskemmtilegast er auðvitað þegar hægt er að hlæja mikið á meðgöngunni,“ segir Margeir. 

„Einhver virðist hafa sett tíkall í trúðinn, enda er þetta jestermaxxing af hæstu gráðu og hver hefði trúað því að Instagram síðan hans Villa Vill myndi hrinda af stað þessari atburðarrás,“ bætir hann við.

Ljósmynd verður lag

Því næst kom bresk-nígeríski rapparinn Magugu við sögu en þeir félagar kynntust á teknóklúbbi í Lissabon. Magugu mætti í stúdíóið til Margeirs og spurði hvort þeir ættu ekki að taka eitthvað upp saman. 

Margeir sýndi honum ljósmyndina og setti aðeins eitt skilyrði: lykilorð lagsins yrði að vera „Versace“.

MaGuGu skildi strax í hvaða átt þetta stefndi, acid-maskínan fór á fullt swing og fljótlega fæddist „Strike A Pose (I’m Wearing Versace)“ sem er sannkallað hip-house, samtvinnað úr hipphoppi og hústónlistinni, þaðan sem DJ Margeir er sprottinn. Lagið kom út föstudaginn 21. ágúst og er fáanlegt á öllum helstu streymisveitum.

Magugu kom síðan til Íslands á Menningarnótt til að frumflytja lagið með Margeiri á tónleikunum Moment sem voru í ár haldnir til styrktar Minningarsjóði Bryndísar Klöru. Magugu mætti galvaskur til Reykjavíkur beint úr einni helgustu teknókirkju veraldar, Panorama-barnum á næturklúbbnum Berghain, þar sem hann kom fram kvöldið áður.

Magugu reyndist sömuleiðis eiga óvænta Íslandstengingu en hann heitir réttu nafni Magnús og var skírður í höfuðið á Íslendingnum Magnúsi Magnússyni, sem stýrði spurningaþættinum Mastermind á BBC í 25 ár.

„Tengingarnar eru því víða. Það er næstum eins og þetta hafi allt verið skrifað í skýin“ segir Margeir ennfremur.

Smíðaði skúlptur sem verður boðinn upp

Margeir hefur smíðað skúlptúrinn „Rólegur Villi Vill“ í tilefni af söfnuninni fyrir Minningarsjóð Bryndísar Klöru. Verkið er sett saman úr ljósmyndinni sem kom öllu af stað og dýrindis Versace-flísum úr Flísabúðinni, listaverk í þrívídd.

Ein vídd til viðbótar er svo að fá Villa sjálfan til að sjá um bakraddir í remix-i lagsins sem er í smíðum, en Villi hefur nú þegar líst yfir miklum áhuga að fá að taka þátt enda er hann yfirlýstur aðdáandi Gianni og Donatellu Versace.

Söfnunin mun halda áfram til mánaðarmóta og skúlptúrinn fer í sölu í lok vikunnar og fer uppboðið fram á Instagram-síðu DJ Margeirs. Allir fjármunir sem safnast renna óskiptir í Minningarsjóð Bryndísar Klöru og hæstbjóðandi eignast gripinn.

„Þessi söfnun skiptir mig máli og þess vegna skora ég á alla sem hafa skemmt sér með okkur á Klapparstígnum í gegnum árin að styðja við átakið. Hver króna telur auk þess sem sálin auðgast við það að styðja málefni sem er jafn brýnt og þetta,“ segir Margeir um söfnunina.

Hægt er að styrkja Minningarsjóð Bryndísar Klöru og eiga séns á að vinna góða vinninga í leiðinni inni á Moment.is.