Taka á brotakenndri upp­lýsinga­gjöf um heilsu­far dýra

Gunnar Kolbeinsson og Viktor Thulin Margeirsson, eigendur tæknifyrirtækisins Test13 standa að appinu en Saga Arnarsdóttir á hugmyndina að verkefninu. 

Hún starfar á dýraspítala og fannst vanta miðlægan grunn svo að gæludýraeigendur gætu verið með yfirsýn yfir sjúkraskrá og heilsufar dýranna, en áður en appið kom til sögu var enginn miðlægur grunnur fyrir slíkar upplýsingar.

„Þú sem gæludýraeigandi ert kannski búinn að fara með dýrið þitt á þrjá mismunandi dýraspítala út af því að það eru mismunandi sérfræðingur á öllum stöðunum og þá er svona hálfkláruð mynd af sjúkraskránni því dýraspítlaarnir tala ekki endilega saman. Þeir deila ekki kerfi og geta ekki nálgast sjúkraskrár hjá öðrum spítölum,“ segir Viktor.

Í appinu, Dýrabók.is, geta gæludýraeigendur sótt miðlæga sjúkraskrá dýranna, skoðað bólusetningar, lyfjagjafir, þyngd og aðrar heilsufarsupplýsingar.

„Fólki finnst bara rosalega gott að vera með allar upplýsingar á einum stað og sjá hvenær fór ég í síðustu skoðun? Hvenær er árlega skoðunin, hvenær þarf ég að láta ormahreinsa aftur? Hvernig er þróun og þyngd á gæludýrinu mínu, sem er mjög mikilvægt og er oft vísir að því að það sé eitthvað að.“

Auk þess sem hægt er að finna upplýsingar um heilbrigðisþjónustu fyrir dýr og aðgengi að dýraspítölum.

„Þannig að fólk geti skoðað alla gæludýraspítalana og séð upplýsingar um opnunartíma, símanúmer og tölvupóstfang. Hvernig hægt er að hafa samband og síðan er takki fyrir þá dýraspítala sem bjóða upp á að bóka tíma á netinu.“