Ís­lensku stelpurnar unnu Dani og eru einum sigri frá A-deild

Íslenska liðið vann níu stiga sigur á Danmörku, 87-78, í undanúrslitaleiknum og hefur þar með unnið alla leiki sína í B-deild Evrópukeppninnar sem fer fram í Ioannina í Grikklandi.

Stjörnukonan Berglind Katla Hlynsdóttir og Valskonan Rún Sveinbjarnardóttir áttu báðar flottan leik en það voru líka fleiri stelpur að skila til liðsins.

Berglind var frábær með 31 stig, 9 fráköst, 8 stoðsendingar, 4 stolna bolta og 4 varin skot en Rún skoraði 20 stig og stal 4 boltum.

Stjörnukonan Eva Ingibjörg Óladóttir var einnig mjög traust með 8 stig, 6 fráköst og 6 stoðsendingar og Haukakonan Eva Bryndís Ingadóttir var með 8 stig og 12 fráköst.

Berglind hefur þar með skorað yfir þrjátíu stig í öllum þremur leikjum íslenska liðsins á mótinu en hún var með 40 framlagsstig í leiknum í dag.

Sigurinn þýðir að íslenska liðið spilar til úrslita um sigur í þessum hluta Evrópukeppninnar en það lið sem stendur uppi sem sigurvegari spilar á Eurobasket-mótinu á næsta ári.

Mótherji íslensku stelpnanna í úrslitaleiknum verður annaðhvort heimastúlkur frá Grikklandi eða Noregi sem eiga eftir að mætast í hinum undanúrslitaleiknum.