Héldu annað brúð­kaup í leyni á sveita­setri í Surrey

Holland og Zendaya eru án efa stærsta stjörnupar heims og eru bæði nýbúin að leika í tveimur stærstu kvikmyndum ársins, The Odyssey og Spider-Man: Brand New Day. Þau hafa  þurft að fylgja báðum myndum eftir með löngum fjölmiðlatúrum og því lítill tími gefist í annað.

Sjá einnig: Köngulóarmaðurinn slær sögulegt met

Hjónin giftu sig í lítilli athöfn fyrr á árinu sem Holland staðfesti í viðtali við Esquire í júní. Parið náði svo loksins að fagna brúðkaupinu í Surrey í suðausturhluta Englands með þriggja daga veislu sem hófst á mánudaginn. Veislan fór fram með leynd en núna eru upplýsingar um hana loksins farnar að kvisast út.

Sveitasetrið Beaverbrook er fimm stjörnu lúxushótel með útsýni yfir Surrey-hlíðar og er stutt frá heimili hjónanna í Richmond. Samkvæmt heimildum The Sun lögðu hjónin mikið upp úr því að koma í veg fyrir að upplýsingar um brúðkaupið eða myndir úr því lækju í fjölmiðla þannig að hvorki gestir né starfsfólk fengu að vera með síma.

Litlar upplýsingar liggja þó fyrir um brúðkaupið nema hvað í því var „náttúrulegt“ þema og um 250 gestir, þar á meðal fjölskylda og vinir en einnig þekkt nöfn á borð við Timothee Chalamet, Kylie Jenner og Robert Downey Jr.

Sjá einnig: Tom Holland og Zendaya kaupa sitt fyrsta heimili saman

Viðburðurinn hófst með æfingakvöldverði á mánudagskvöld. Sjálft brúðkaupið fór fram við sólsetur á þriðjudagskvöldið með brúðkaupsveislu í kjölfarið þar sem bæði Zendaya og Holland héldu ræður. Á miðvikudagsmorgun var gestum síðan boðið upp á veglegan kampavínsmorgunverð.

Þrátt fyrir að vera bæði heimsfræg hafa Holland og Zendaya haldið einkalífi sínu mestmegnis fjarri sviðsljósinu. Þau hafa þekkst síðan þau byrjuðu að leika saman í kvikmyndum um Köngulóarmanninn árið 2016, byrjuðu saman árið 2021 og trúlofuðu sig í lok árs 2024.